అనంతగిరి డెస్క్(హైదరాబాద్) :తెలంగాణలో ఇటీవల భారీ వర్షాలు, వరదలు కారణంగా తీవ్రంగా నష్టపోయిన ప్రజల కోసం రాష్ట్ర ప్రభుత్వం ప్రాధాన్యంగా చర్యలు చేపట్టింది. వరదల వల్ల చనిపోయిన వారి కుటుంబాలకు రాష్ట్ర ప్రభుత్వం రూ. 5 లక్షల ఆర్థిక సాయం అందజేయనుందని రాష్ట్ర ముఖ్యమంత్రి రేవంత్ రెడ్డి స్పష్టం చేశారు..అదేవిధంగా, వరదలతో తీవ్రంగా ప్రభావితమైన ఖమ్మం, భద్రాద్రి కొత్తగూడెం, మహబూబాబాద్, సూర్యాపేట జిల్లాల కలెక్టర్లకు తక్షణ సాయం కోసం రూ. 5 కోట్లు విడుదల చేయనున్నట్లు సీఎం తెలిపారు. ఈ నిధులు వెంటనే వరద ప్రభావిత ప్రాంతాల్లో సహాయక చర్యలు, పునరావాసం కోసం వినియోగించుకోవాలని ఆదేశించారు.ఇంకా, వరదల్లో చనిపోయిన పశువులు, మేకలు, గొర్రెలకు పరిహారాన్ని పెంచాలని సీఎం రేవంత్ రెడ్డి పేర్కొన్నారు. ఈ నిర్ణయం పశువుల యజమానులను ఆదుకునేందుకు తీసుకున్నామని వివరించారు.అంతేకాకుండా, ఈ విపత్తును జాతీయ విపత్తుగా పరిగణించి, కేంద్ర ప్రభుత్వం నుంచి తక్షణమే ఆర్థిక సాయం అందించాలని ప్రధాని నరేంద్ర మోడీకి లేఖ రాయనున్నట్లు సీఎం రేవంత్ రెడ్డి ప్రకటించారు. దీనితో పాటు, ప్రధాని మోడీ వరద ప్రభావిత ప్రాంతాల్లో స్వయంగా పర్యటించాలని ఆయన కోరారు.ఈ నిర్ణయాలు వరదల కారణంగా నష్టపోయిన ప్రజలకు కొంతమేర న్యాయం చేయనున్నాయని సీఎం రేవంత్ రెడ్డి అన్నారు.
