వికారాబాద్ ప్రభుత్వ ఆసుపత్రిలో దారుణ పరిస్థితులు

వికారాబాద్: జిల్లా కేంద్రంగా ఉన్న వికారాబాద్ ప్రభుత్వ ఆసుపత్రిలో కనీస సౌకర్యాల లోపం బయటపడింది. రాత్రి సమయంలో విద్యుత్ సరఫరా నిలిచిపోవడంతో రోగులు తీవ్ర ఇబ్బందులు ఎదుర్కొన్నారు. ఆసుపత్రిలో జనరేటర్ ఉన్నప్పటికీ డీజిల్ లేకపోవడంతో అది పనిచేయకపోవడం పరిస్థితిని మరింత దిగజార్చింది. విద్యుత్ అంతరాయం సమయంలో ప్రత్యామ్నాయ ఏర్పాట్లు లేకపోవడంతో వైద్యులు సెల్‌ఫోన్ టార్చ్‌ల వెలుతురులోనే రోగులకు చికిత్స అందించాల్సి వచ్చింది. ఈ ఘటన ఆసుపత్రి నిర్వహణపై ప్రశ్నలు లేవనెత్తుతోంది. పేరుకే పెద్ద ప్రభుత్వ ఆసుపత్రి ఉన్నా, అవసరమైన వసతులు లేకపోవడం పట్ల రోగులు, వారి కుటుంబ సభ్యులు ఆగ్రహం వ్యక్తం చేశారు. అత్యవసర పరిస్థితుల్లో కూడా సరైన ఏర్పాట్లు లేకపోవడాన్ని తీవ్రంగా ఖండించారు. జనరేటర్ ఉన్నా డీజిల్ లేకపోవడం అధికారుల నిర్లక్ష్యానికి నిదర్శనమని రోగుల బంధువులు మండిపడ్డారు. ఇలాంటి పరిస్థితుల్లో రోగుల ప్రాణాలు ప్రమాదంలో పడుతున్నాయని ఆందోళన వ్యక్తం చేశారు. ఇప్పటికైనా సంబంధిత అధికారులు స్పందించి ఆసుపత్రిలో కనీస వసతులు కల్పించాలని ప్రజలు కోరుతున్నారు.