ఉద్యోగుల బీమా, ఆరోగ్య పథకాలపై సీఎం రేవంత్ రెడ్డికి కృతజ్ఞతలు

హైదరాబాద్, ఫిబ్రవరి 24: రాష్ట్ర ప్రభుత్వ ఉద్యోగుల కోసం ప్రమాద బీమా మరియు సమగ్ర ఆరోగ్య పథకాలను ప్రకటించిన ముఖ్యమంత్రి ఎ. రేవంత్ రెడ్డికు ఉద్యోగ సంఘాల నేతలు, ఉద్యోగులు కృతజ్ఞతలు తెలిపారు. ముఖ్యమంత్రిని ఆయన నివాసంలో తెలంగాణ ప్రభుత్వ ఉద్యోగ, ఉపాధ్యాయ, పెన్షనర్ల ఐక్య కార్యాచరణ సమితి (JAC) ప్రతినిధులు కలిసి ధన్యవాదాలు తెలిపారు. టీజీవో, టీఎన్జీవో, రెవెన్యూ, ఉపాధ్యాయ మరియు పెన్షనర్ల సంఘాల నాయకులు ఈ సందర్భంగా పాల్గొన్నారు. తమ చిరకాల వాంఛ అయిన బీమా, ఆరోగ్య సదుపాయాలను ప్రభుత్వం అమలు చేయడం పట్ల హర్షం వ్యక్తం చేశారు. ఈ రెండు పథకాలు ఉద్యోగుల చరిత్రలో నిలిచిపోతాయని పేర్కొన్నారు. ప్రభుత్వం గుర్తింపు ఇచ్చిన 652 ప్రభుత్వ, ప్రైవేటు ఆసుపత్రుల్లో 1,998 వ్యాధులకు నగదు రహిత చికిత్స అందించేలా చర్యలు తీసుకోవడం ప్రశంసనీయమని ఉద్యోగ సంఘాల నేతలు తెలిపారు. ఈ సందర్భంగా జేఏసీ నాయకులు మారం జగదీశ్వర్, ఏలూరి శ్రీనివాసరావు, వి. లచ్చిరెడ్డి, కె. రామకృష్ణ తదితరులు ముఖ్యమంత్రిని కలిసి అభినందనలు తెలిపారు. ఉద్యోగుల సంక్షేమం పట్ల ప్రభుత్వం చూపుతున్న చిత్తశుద్ధి కొనసాగాలని వారు కోరారు.